Tuesday, January 19, 2021
  • sq
  • en
  • mk
Home Blog Page 2

AlternAtivA: Për kë vlen dënimi për mosmbajtje të maskës në RMV?

Ditëve të fundit shohim se eksponentë të lartë qeveritarë pozojnë në vende të mbyllura e të hapura pa mbajtje të maskave, që për qytetarët e tjerë janë të detyrueshme dhe ata, madje, ndëshkohen për mosmbajtje të tyre. Siç e pamë, para do ditëve vetë kryeministri, Zaev, e ministri i Shëndetësisë, Filipçe, pozuan pa maska dhe pa distancë, ndërsa dje Ali Ahmeti me kryetarin e Kuvendit, Talat Xhaferi, dhe krejt ministrat e kësaj partie, ishin mbledhur bashkë, që të festojnë ditëlindje patetike në kohë pandemie, edhe ata pa maska e pa distancë, gjithë kjo në kohën kur qytetarët gjobiten gjithandej për maska.
Prandaj, AlternAtivA e pyet ministrin e Punëve të Brendshme, Oliver Spasovski, se për kë vlen dënimi për maska në këtë shtet? A vlen ky dënim vetëm për qytetarët e rëndomtë që nuk janë në pushtet apo për të gjithë qytetarët njësoj? Nëse përgjigjja juaj është e dyta, atëherë ne presim që ju t’i dëshmoni opinionit se Ministria e Punëve të Brendshme i ka dënuar këta persona për mosmbajtje të maskës. Vetëm atëherë ju do të keni të drejtë të vazhdoni t’i dënoni qytetarët për mosmbatje të maskës. Në të kundërtën, ju nuk keni moral për të shqiptuar më dënime dhe kjo do të jetë dëshmi se juve ju ka rënë maska dhe jua ka zbuluar fytyrë e vërtetë të një qeverisje që ka për qëllim t’i rrjepë qytetarët për t’u azdisur pushtetarët.

Shkup, 05.01.2021 AlternAtivA – Shkup

AlternAtivA: Drejtori i “Hekurudhave të Maqedonisë” nga Dvizhenje Besa i përjashton 21 shqiptarë

Këto ditë, kur ndërmarrja “Hekurudhat e Maqedonisë – Transporti” i ka përzënë shqiptarët nga puna, sot jemi këtu që të shpjegojmë për opinionin se nga 31 punëtorët e angazhuar me kontratë pune, drejtori i kësaj ndërmarrje, një shqipfolës nga Dvizhenje Besa, i përjashton 21 shqiptarët dhe i mban në punë 10 maqedonasit. Vetëm ky informacion është i mjaftueshëm për ta kuptuar se kujt i shërben ky njeri dhe për çfarë agjende është angazhuar ai.
Ne, si parti politike, e njohim mirë potencialin antishqiptar dhe hakmarrës të këtij drejtori të kapur dhe të asaj partie tashmë të shkrirë në LSDM, por duam ta pyesim qeverinë se si ka mundësi të lejojë që në këtë kohë pandemie e krize ekonomike, si dhe në kulm të dimrit, t’i përjashtojë njerëzit nga puna vetëm për arsye se janë shqiptarë?
Me këtë rast duam të shpjegojmë se derisa AlternAtivA e ka drejtuar atë drejtori, numri i shqiptarëve aty nga 1% (ose 11 shqiptarë), siç e gjetëm më 2018, është rritur në 9% (ose 82 shqiptarë) në vitin 2020. Madje, përqindja e shqiptarëve në pozita drejtuese aty ka qenë 0% kur ne e morëm atë drejtori, ndërsa e kemi lënë më 28% shqiptarë në pozita drejtuese.
Megjithatë, ja që ende ka argatë e të a.q. parti shqipfolëse, që vijnë në pushtet për t’iu hakmarrë shqiptarëve dhe për t’u bërë favore maqedonasve. Kjo ka qenë kështu qysh nga koha e Jugosllavisë me Rakoviqin e deri te Gruevski, ndërsa – për fat të keq – po vazhdon edhe sot, kësaj radhe bile me protagonistë shqipfolës.
Nisur nga kjo, AlternAtivA u bën thirrje të gjithë atyre shqiptarëve që janë përjashtuar që të durojnë, sepse në çastin e parë që do të kthehemi në pushtet – ndërsa rrethanat thonë se kjo do të ndodhë shumë shpejt – ata do të kthehen në punë dhe asnjë shqiptar, por edhe askush tjetër, nuk do të përjashtohet më nga puna pse i takon një bashkësie etnike ose një partie politike.

Shkup, 02.01.2021 AlternAtivA – Shkup

Urimi i kryetarit të AlternAtivA-s, Afrim Gashi, për Vitin e Ri 2021

Të nderuar qytetarë, më lejoni që, derisa i numërojmë orët e fundit të këtij viti, t’ju drejtohem për ta bërë një përmbledhje të vitit që e po e lëmë pas dhe për të uruar një vit të ri me shpresë e përpjekje të re.

Të nderuar qytetarë, besoj thellë se të gjithë ne jemi të lumtur që po lëmë pas vetes një vit, i cili në gjithë botën do të mbahet mend si vit i mbrapshtë, kur një virus e dëshmoi pafuqinë e njeriut dhe fuqinë e Zotit. Miliona viktimat e shkaktuara nga virusi Covid-19 do të jenë emrat e përveçëm të dhimbjes që e ka përshkruar këtë vit nga kjo murtajë. Që nga shkurti i këtij viti bota jonë ka qenë në ankth dhe ne po vazhdojmë të jetojmë ashtu. Duke u gjendur në këtë situatë pandemie, edhe vendi ynë dhe të gjithë ne e përjetuam në lëkurën tonë vështirësinë e jetës në kushte të këtilla. Natyrisht, si parti politike, nuk mund të mos konstatojmë se ndonëse vala e parë e virusit kaloi pak më lehtë, vala e re vjeshtore erdhi me pasoja fatale, që akoma po i vuajmë. Si subjekt opozitar, ndonëse kishim dhënë disa propozime që nuk u morën para sysh nga pushteti, sot mund të themi se një pjesë të madhe të fajit për këtë gjendje e bart pikërisht qeveria e vendit. Ajo, duke e ditur dhe duke i pasur të gjitha informacionet për atë që vijonte në këto muaj, u soll me indiferencë dhe neglizhencë, gjë që i kushtoi vendit me shumë jetë të humbura dhe me shumë infektime të tjera.
Viti 2020 do të mbahet mend sigurisht edhe për manipulimin e madh zgjedhor që u shkaktua me zgjedhjet e parakohshme parlamentare të 15 korrikut. Jo që më parë nuk kanë ndodhur dukuri të këtilla, por përmasat e manipulimit të këtij viti thjesht e shfytyruan vullnetin e votuesve, duke prodhuar një qeveri që ka shumicë de jure, por jo edhe de facto. Besoj se margaritari i këtij viti, sigurisht për të ardhur keq, mbetet premtimi parazgjedhor i partisë shqiptare në pushtet, pra “kryeministri shqiptar”, që pastaj pa u skuqur fare e duke e shndërruar mashtrimin në standard të politikës së tyre, u tërhoq për ta pranuar kryeministrin aktual dhe, për më keq, duke u përpjekur që ta kthejë këtë në një fitore. Mashtrimi i këtillë do të jetë i kushtueshëm sigurisht edhe një kohë të gjatë dhe e ka dëmtuar rëndë moralin publik politik dhe besimin e shqiptarëve të vendin tonë në aktorët politikë.
Nëse më duhet të deklarohem për punën e qeverisë së re, me keqardhje më duhet të them se kjo qeveri – si asnjë para kësaj e shpresoj edhe si asnjë pas kësaj – është qeveri e dështimit në katër planë shumë të rëndësishme. Vërtet pandemia ishte diçka që erdhi papritmas, por kjo nuk është arsye që ne të mos e themi se pasojat fatale të saj erdhën për shkak të keqmenaxhimit të saj nga kjo qeveri. Shifrat e të vdekurve dhe të infektuarve, si dhe mungesa e kapaciteteve spitalore e farmaceutike, janë dëshmi se për këtë gjendje, më shumë se pandemia, përgjegjësinë e ka qeveria. E kur kësaj i shtohet edhe informacioni se ne do të jemi ndër vendet e fundit që do të marrin vaksina, kjo po ashtu për shkak të pakujdesisë së këtij pushteti, bëhet i pallogaritshëm dhe i pakonceptueshëm dëmi që kjo qeveri po ua sjell qytetarëve të saj. Dështimi i dytë i saj e ka emrin varfëri ose kolaps ekonomik. Humbja e mbi 85 mijë vendeve të punës, shuarja e qindra bizneseve, që nënkuptojnë rritje enorme të varfërisë, mospërmbushja e asnjë premtimi për rritje ekonomike, edhe një kohë të gjatë do të mbeten në listën e prioriteteve për riparimin e jetës së qytetarëve tanë. Dështimi i tretë është arsimi. Duke e mos marrë në konsideratë propozimin tonë që viti shkollor të fillojë në janar 2021 e ndërkohë të bëhen përgatitjet e nevojshme, kjo qeveri – me paaftësinë e vet – përjashtoi nga e drejta kushtetuese për mësim diku 60 mijë nxënës, ndërsa rrezikoi shumë të tjerë dhe na dëshmoi se mësimi në distancë më shumë ka qenë një improvizim sesa realitet, për çka jemi të bindur se pasojat do të na ndjekin edhe për shumë vite. E kur dështimit në arsim i shtohet edhe ngarkesa e arsimtarëve, që kanë bërë dyfish punë, ndërsa janë paguar si më parë, edhe po ta themi me eufemizëm, do të duhej të thoshim se ky vit shkollor lë shumë për të dëshiruar. Dhe, dështimi i katërt është sigurisht integrimi. Edhe shtegu i vetëm për të shpëtuar nga kjo gjendje, pra për t’i hapur negociatat për BE, tashmë po venitet, sepse kryeministri dhe diplomacia e vendit tonë – me joseriozitetin e tyre – na vendosën para vetos bullgare.
Dhe, sikur të mos mjaftonte kjo, ditëve të fundit nuk kalon asnjë edicion informativ pa lajme për qarkullimin ilegal të lëndëve narkotike në vendin tonë. Nëse kjo vihet në korrelacion me propozimin e qeverisë për legalizimin e shitjes së narkotikëve, vërtet është për t’u shqetësuar për të ardhmen e brezave që vijnë.
Nisur nga kjo, detyra jonë mbetet që sa më shpejt të mundësojmë qeveri të zgjeruar dhe zgjedhje të parakohshme, në mënyrë që mos të shtohet lista e këtyre dështimeve, sepse – fundja – ne nuk jemi të lumtur që ata kanë dështuar, ngase çmimin e paguajnë të gjithë qytetarët.
Sidoqoftë, qytetarë të dashur, pasi që kemi kaluar një vit kaq të zymtë, unë jam i sigurt se më keq nuk mund të bëhet. Andaj jam shumë i bindur se vitin tjetër do të jetë sigurisht më mirë. Sfida jonë për të sjellë mirëqenie ekonomike, shtet të së drejtës, shëndetësi dhe arsim cilësor, integrim në BE, si dhe luftë kundër korrupsionit e krimit të organizuar, mbeten përkushtimi ynë më i lartë, me të cilin nuk mund të bëjmë kompromis.
Prandaj, përfitoj nga ky rast që të gjithë qytetarëve t’ju dëshiroj që kurrë më të mos u kthehet një vit si 2020-ta. Uroj që 2021-shi të jetë jo vetëm fillimi i dekadës së tretë të mileniumit të dytë në shekullin e ri, por edhe gurthemeli i parë i një të ardhmeje më të mirë për të gjithë. Duke besuar thellë se ne mund ta bëjmë këtë ndryshim, si dhe duke qenë i sigurt se kjo varet vetëm nga ne, jua uroj vitin e ri 2021, duke u lutur që së pari të keni shëndet në familjet tuaja, duke i dhënë fund edhe murtajës së pandemisë Covid-19, paqe në shpirtin tuaj, si dhe suksese në të gjitha fushat e jetës.
Unë jam fort i bindur se në fund të vitit tjetër do të mund t’i radhisim sukseset e punës sonë të përbashkët, që na pret në vitin që vjen.

Qoftë i mbarë për të gjithë viti 2021!

Afrim Gashi

Shkup, 30.12.2020

https://www.facebook.com/1980705965582959/posts/2834775236842690/

Afrim Gashi u takua me kryetarin e Gjykatës Kushtetuese, Salih Murat

Kryetari i AlternAtivA-s, Afrim Gashi, i shoqëruar nga shefi i Kabinetit, Meriton Civuli, sot ka realizuar takim me kryetarin e Gjykatës Kushtetuese të Maqedonisë së Veriut, Salih Murat.
Gjatë takimit në fjalë, u fol mbi proceset reformuese gjyqësore në vend dhe ri-dizajnimin e sistemit gjyqësor shtetëror.
Kryetari i Gjykatës Kushtetutese, Salih Murat, falënderoi kryetarin Gashi, për rolin unifikues dhe inkurajues që po e shfaq AlternAtivA, në hapjen e procese reformuese gjyqësore të shtetit.

Kryetari i AlternAtivA-s, Afrim Gashi u takua me Kryeparlamentarin Turk, Mustafa Shentop

Kryetari i AlternAtivA-s, Afrim Gashi, i shoqëruar nga ish-ministri i Kulturës, aktualisht deputet i AlternAtivA-s, Hysni Ismaili, mbrëmë në Shkup ka realizuar takim me kryetarin e Asamblesë së Madhe Kombëtare të Turqisë (TBMM), Mustafa Shentop.
Në takim me Kryeparlamentarin Turk, Mustafa Shentop, u fol mbi zhvillimet e fundit në vend dhe rajon, marrëdhëniet politike-diplomatike mes Maqedonisë së Veriut dhe Republikës së Turqisë, si dhe raportet ndëretnike mes popullit turk dhe kombeve në Maqedoninë e Veriut.
Gjithashtu, temë e bisedës Gashi-Shentop ishte edhe procesi euro-atlantik i vendit dhe roli i rëndësishëm dhe i fuqishëm diplomatik i Republikës së Turqisë në raport me Ballkanin dhe, veçanërisht, me Maqedoninë e Veriut.
Kryeparlamentari turk, Shentop, shprehu mirënjohje dhe falënderime miqësore drejt kryetarit Gashi, duke theksuar rolin konstruktiv dhe efektiv të AlternAtivA-s, si parti e qendrës së djathtë, në ndërtimin e urave vëllazërore dhe miqësore mes shqiptarëve dhe turqve.
Ndryshe, në fund të takimit, të dyja palët u dakorduan që takime të këtilla miqësore të vazhdojnë edhe në të ardhmen.

ASH-AAA: Reagim ndaj Koferencës së Kryeminstrit Zaev dhe kapjes me lëndë narkotike të të afërmit të Zv. Ministrit të MPB!

Ditëve të fundit jemi dëshmitarë të aksioneve të ndryshme për kapjen e lëndëve narkotike në vend, ku pas rastit të Haraçinës, para disa ditëve kishim rastin më flagrant të kapjes së familjarit të zv Ministrit për Punë të Brendshme, Nazim Bushit, të cilit iu kapën mbi 100 kg lëndë narkotike.
Këto aksione vijnë pas paralajmërimeve për propozim ligjit për legalizimin e kultivimit të lëndëve narkotike në Maqedonië e Veriut, të paralajmëruara nga kjo Qeveri dhe nga vet Kryemisntri Zoran Zaev.
Nga ana e MPB deri më sot nuk kemi të dhëna të hollësishme rreth këtyre aksioneve dhe përgjegjegjësve të tyre, por rasti i fundit i kapjes me lëndë narkotike të një të afërmi të Zv.Ministrit Bushi, na çon të mendojmë se këtu janë të përfshirë edhe eksponent të pushtetit.
Si koalicion ASH – AAA kërkojmë Dorëheqje nga ana e Zv.Ministrit të MPB, për arsye morale, por edhe për arsye që i njejti mund të ndikojë në zbardhjen e rastit gajtë hetimeve dhe gjykimit të të njejtit për veprën penale.

Kryeministri Zaev, sot në një konferencë lidhur me Popozim Ligjin për legalizim të lëndëve narkotike, më shumë ishte i interesuar për përfitimet nga legalizimi I kësaj industrie, që do të kishte Qeveria, duke mos llogaritur pasojat dhe problemet që mund të shkaktoj ky ligj te qytetarët e vendit.
Ai si duket përshpejton përpjekjet e tij që ky ligj sa më shpejt të kalojë në kuvend dhe me këtë tenton të fsheh edhe rastet e fundit me kapjen e lëndeve narkotike dhe rasteve tjera kriminale që po ndodhin çdo ditë me shpërndarjen e lëndëve narkotike.
Prandaj, ne pyesim Kryeministrin Zaev, a është gjithçka te përfitimi material i Qeverisë?
Koalicioni ASH-AAA nuk mbështet idenë për legalizimin të lëndëve narkotike dhe nuk do të votojmë një ligj të tillë, sepse përvech tjerash dilemma jonë është nëse Kryeministri Zaev e ka hallin e ekonomisë familjare apo ekonomisë së shtetit?
A jemi të përgatitur ne si shoqëri dhe si shtet për të kaluar një ligj të tillë, i cili do të legalizoj përdorimin e lëndëve narkotike nga qytetarët?
Fillimisht, Kryeminstri Zaev dhe MPB duhet pastruar rastet kriminale me narkotikët, me çka do të duhej një siguri më e madhe për qytetarët në rast legalizimi të kultivimit dhe përdorimit të mjeteve narkotike në vend. Në rend të parë qytetari!

Afrim Gashi uron Ditën e Arsimit Turk në Republikën e Maqedonisë së Veriut

Sot me rastin e 21 Dhjetorit – Ditës së Arsimit Turk në Republikën e Maqedonisë së Veriut, më lejoni që t’ua shpreh urimet e mia më të sinqerta bashkëqytetarëve tanë turq.
Bashkëpunimi i ndërsjellë mes shqiptarëve dhe turqve është dëshmia më e mirë e lidhjes kulturore dhe ura e vëllazërisë shekullore shqiptaro-turke.
Urime dhe përgëzime!

Afrim Gashi
Kryetari i AlternAtivA-s

AlternAtivA: A është Buçkovski shenjë dështimi e Osmanit dhe Zaevit?

Pasi që Qeveria e Republikës së Maqedonisë së Veriut ka caktuar që përfaqësues special për bisedime me Bullgarinë të jetë Vlladimir Buçkovski, detyrimisht shtrohen dy pyetje: a është kjo shenjë se ka dështuar ministri i Punëve të Jashtme, Bujar Osmani, apo shefi i tij, Z. Zaev, nuk ka besim që një shqiptar të zhvillojë negociata që janë kaq të rëndësishme për identitetin etnik dhe gjuhësor të maqedonasve?
Sido që të jetë përgjigjja e këtyre pyetjeve, e vërteta lakuriqe mbetet se kjo qeveri ka dështuar në shtyrjen e procesit të integrimit, ka dështuar në ndërtimin e marrëdhënieve të mira me fqinjin tonë lindor dhe, së fundi, ka dështuar në krijimin e kohezionit të brendshëm politik për tema kaq të rëndësishme.
Prandaj, AlternAtivA konkludon se Buçkovski, përveçse sinonim i dështimit të Osmanit e Zaevit, më shumë se kaq është simbol i ngërçit të integrimeve dhe pesimizmit të qytetarëve tanë, si dhe mesazh se në vend që Maqedonia e Veriut të bëhet anëtar i BE-së, qytetarët e saj do të duhet të bëhen emigrantë në BE.

Shkup, 14.11.2020

AlternAtivA – Shkup

Afrim Gashi uron Lulzim Bashën në 30 vjetorin e PD-së: Demokracia mbetet lajtmotiv i shtetit dhe i popullit shqiptar

“30-vjetori i Partisë Demokratike të Shqipërisë pa dyshim se mbetet të jetë një ndër shenjat më të fuqishme të pluralizmit shqiptar, që nga protestat popullore të studentëve nga viti 1990 e këndej.
30 vite rezistencë për pluralizëm dhe demokraci janë tregues i denjë se fuqia e popullit çdoherë do të jetë ngadhënjyese e palëkundur e demokracisë shqiptare.
Urime miku im, Lulzim Basha, përvjetorin e 30-të të PD-së, me shpresë se demokracia mbetet lajtmotiv i shtetit dhe i popullit shqiptar.

Përgëzime dhe urime!”, ka shkruar kryetari i AlternAtivA-s, Afrim Gashi.

Zejd Rexhepi nga Alternativa takohet me Zëvendëskryetarin e Partisë për Drejtësi dhe Zhvillim – AK Parti të Turqisë, z. Numan Kurtullmush

 

 

Deputeti i AlternAtivA-s, Skender Rexhepi -Zejdi, në vazhdën e takimeve të tij në kryeqytetin e Turqisë – Ankara, sot ka realizuar takim miqësor me zëvendëskryetarin e Partisë për Drejtësi dhe Zhvillim – AK Parti, z. Numan Kurtullmush.
“Pandemia globale si dhe rethanat ekonomike dhe politike ne Ballkan, ishin tema e bisedimeve me zëvendëskryetarin e AK Partisë, z. Numan Kurtulmush.
Në kuadër të bisedës u dakorduam që gjendja e rëndë ekonomike dhe sociale në botë, e posaqërisht në Maqedoninë e Veriut, do të lenë pasoja të rënda, andaj është i domosdoshëm krijimi dhe zhvillimi i kushteve të bashkëpunimit institucional gjithmonë në zbutjen e pasojave të rënda ekonomike dhe sociale të shoqërisë në vendin tonë, gjendje e cila edhe ashtu ka qenë shumë e rëndë posaqërisht në vendbanimet shqiptare.
Gjithashtu biseduam edhe për format e bashkëpunimit të ndërsjellë partiak, posaqërisht në nivel të këmbimit të përvojave në raport me organizimet e forumeve të ndryshme si dhe qasjeve më të suksesshme ndaj sfidave të ndryshme organizative, poltike dhe shoqërore”, ka shkruar Zejd Rexhepi nga Alternativa.

 

Populare