Friday, June 18, 2021
  • sq
  • en
  • mk
Home Blog

AlternAtivA – Dega Kumanovë: BDI-ja abuzon me vauçerët për turizëm

Të nderuar qytetar të Kumanovës, të nderuara media, këto ditë Ministria e Ekonomisë në Republikën e Maqedonisë së Veriut i prezantoi vauçerët e rinj për turizëm në vlerë prej 12.000 denarësh, me të cilët synohet zhvillimi i turizmit dhe ashtu të krijohet një mundësi që qytetarët tanë me të ardhura të vogla, të kenë mundësi t`i përdorin ato për pushime. Por, ajo që po bie në sy në lidhje me këta vauçerë janë dokumentet e shumta dhe ngatërresat e tjera që u vendosen qytetarëve tanë për ta fituar këtë të drejtë.
Duke parë se si Ministria e Ekonomisë e ka ndërlikuar procedurën për ta fituar këtë vauçer, kjo na shtyn të mendojmë se kështu po krijohen pengesa që pastaj të mund të abuzohet dhe në këtë mënyrë të joshen votuesit për zgjedhjet lokale, sidomos në Kumanovë.
Meqë BDI-ja në Kumanovë ka pësuar debakël në disa cikle zgjedhore radhazi, ne kemi dyshime të bazuara se kësaj radhe Ministria e Ekonomisë, që drejtohet nga kuadër i BDI-së, do t’i keqpërdorë vauçerët për turizëm, që përmes tyre ta rrisë votën. Në të vërtetë, nuk është hera e parë që BDI-ja tenton të bëjë presione të këtilla për vota në Kumanovë. Në çdo cikël të zgjedhjeve, qofshin ato parlamentare ose lokale, drejtuesit e kësaj partie kanë tentuar që përmes formave dhe mënyrave të ndryshme të abuzojnë me votat e kumanovarëve. Por, ka kaluar qëmoti ajo kohë kur BDI-ja i keqpërdorte shqiptarët e Kumanovës.
Sidoqoftë, ne ia bëjmë me dije BDI-së se në Kumanovë çfarëdo marifeti të provojë, kjo nuk kalon më. Atë e pret disfata e radhës. Kumanova tashmë është rreshtuar në anën e koalicionit opozitar AlternAtivA & Aleanca për Shqiptarët.
Krejt në fund dëshirojmë t’i porosisim qytetarët e Kumanovës dhe më gjerë, të cilët kanë mundësi të përdorimit të këtyre vauçerëve, që edhe nëse kanë presion nga ana e BDI-së, t`i marrin dhe t’i përdorin ato, pasi që ato para janë të tyre, janë nga buxheti i mbushur nga taksat dhe tatimet tona. Natyrisht, para kutisë së votimit dhe me votën e tyre duhet t’ua tregojnë vendin këtyre keqpërdoruesve të fondeve të buxhetit shtetëror. Ndërkaq, kur të vijmë ne në pushtet, krejt kjo do të jetë një histori e trishtë dhe askush më nuk do të jetë i kushtëzuar nga askush për asgjë. Ne kemi marrëveshje me votuesin e Kumanovës dhe asnjëherë nuk do të tolerojmë që e keqja t’i përsëritet!
Kumanova është në anën e drejtë të historisë.

AlternAtivA – Dega Kumanovë
Kumanovë, 16.06.2021

Koalicioni AlternAtivA & Aleanca për Shqiptarët: Falja e borxheve të komunave është stimulim i paaftësisë dhe korrupsionit

Këto ditë kryeministri Zaev njoftoi se janë siguruar 50 milionë euro që të shlyhen borxhet e komunave. Sikur kjo të ishte hera e parë dhe e vetme dhe sikur kjo të bëhej me qëllim që të funksionalizohen njësitë e vetëqeverisjes lokale, ky do të ishte një superlajm, por kur kihet parasysh se kjo ndodhë tashmë disa herë, me të drejtë mund të konstatojmë se këtu bëhet fjalë për anomali e abuzim dhe jo për sukses.
Në Maqedoninë e Veriut kemi dhjetëra komuna që punojnë me humbje, kemi komuna që nuk i paguajnë shtesat e arsimtarëve, siç vepron – fjala bie – Komuna e Sarajit, por jo vetëm, kemi komuna që nuk kanë kurrfarë transparence financiare dhe që krijojnë dyshime të mëdha për korrupsion, kemi komuna që qëllimisht futen në borxhe, sepse ashtu u mundësohet korrupsioni, ndërsa në fund vjen qeveria dhe ua shlyen të gjitha këto, duke i sjellë në zero. Në terma të menaxhimit me financat publike kjo quhet stimulimi paaftësisë së komunave dhe stimulim i korrupsionit.
Përveç kësaj, kur kjo ndodhë në vitin që pritet të ndodhin zgjedhjet lokale, bëhet evidente se krejt kjo synon ta shpërlajë fytyrën e disa kryetarëve të komunave, që – gjatë menaxhimit me komunat – të vetmen gjë që e kanë rritur është sasia e borxheve. Prandaj, para se të bëhet kjo shlyerje borxhesh, më e rëndësishme është të bëhet një evaluim i punës së komunave dhe të bëhet vlerësimi i saktë, për ta përcaktuar se cilat janë komunat që kanë dështuar, të publikohet se pse ka ndodhur ky dështim, pse janë krijuar ato borxhe dhe ndaj kujt janë krijuar ato borxhe, që vetëm pastaj të mund të flitet për mundësinë e shlyerjes së tyre. Kështu siç vepron kjo qeveri vetëm stimulohet paaftësia dhe keqmenaxhimi me financat publike nga kryetarët e komunave.
Prandaj, i bëjmë thirrje qeverisë, që të mos abuzojë akoma me financat publike dhe të jetë e kujdesshme, sepse përmbytja financiare që e shkakton ajo nuk i fundos vetëm ata, madje më së paku ata, por është fundosje për gjithë shtetin dhe të gjithë qytetarët. Aq më shumë që kjo po ndodhë në kohë pandemie, që gjithsesi ka prodhuar edhe krizë financiare.
Koalicioni AlternAtivA & Aleanca për Shqiptarët propozon që ato para t’u ndahen qytetarëve, të cilët, për shkak të kushteve të rënduara sociale, nuk mund t’i mbulojnë faturat mujore, por edhe kompanive, që janë në prag të falimentimit për shkak të kufizimeve që i ka shkaktuar pandemia.

Koalicioni AlternAtivA & Aleanca për Shqiptarët

Shkup, 15.06.2021

Aleanca për Shqiptarët & AlternAtivA: Visar Betonit po ia dhurojmë një thes çimento

Të nderuar gazetarë dhe ju qytetarë,
Jemi sot këtu para Komunës së Çairit, që në frymë të agjendës së re mjedisore që e ka shpallë Bashkimi Demokratik për Gjelbërim, ta ndihmojmë kryetarin e Çairit, z. Visar Ganiu, për gjelbërimin e Çairit tonë. Siç e dini tashmë, Çairi është komuna më e gjelbër në Maqedoninë e Veriut dhe prandaj është nominuar për çmimin e madh prestigjioz të ndërkombëtar të OKB-së për komunën më të gjelbër në botë.
Si kryetar që për katër vite ka arritur ta gjelbërojë çdo kënd të Çairit tonë, ta eliminojë çdo beton të tepërt dhe ta luftojë betonizimin e Çairit, ne e kemi për detyrim që ta falënderojmë atë dhe si mirënjohje t’ia dorëzojmë këtë thes çimentoje, që të mund t’i ndërtojë disa shtigje betoni për këmbësorë rreth parqeve dhe luleve që i ka mbjellë në Çair. Ne e dimë se ai e urren betonin, andaj nuk ka ndërtuar asnjë pëllëmbë betoni gjatë këtyre viteve në Çair, por do ta lusim me mirësi që ta pranojë këtë thes çimentoje, sepse atij vetë kurrë nuk do i shkonte mendja të ndërtojë një milimetër betoni.
Pasi që ta fitojë çmimin “Komuna më e gjelbër në botë”, jemi të sigurt se Visar Ganiu do të ftohet ta drejtojë edhe Komunën e Kopenhagës, që edhe danezët t’i mësojë se si bëhen komunat e gjelbra. Përvoja e tij në krijimin e zonave të gjelbra do të ishte veçanërisht e dobishme për vende të betonizuara, siç janë shtetet skandinave. Kjo është arsyeja që ne sot po e nderojmë me këtë thes çimentoje dhe po e shprehim ngazëllimin tonë që komuna jonë drejtohet nga një kuadër kaq cilësor, kaq mjedisor dhe kaq jeshilor.
Zaten, puna e kryetarit Visar Ganiu nuk ka si shpjegohet ndryshe, pos me fjalën e urtë se “lulja s’bëhet me kontrata, por me shata e lopata”. Punë e mbarë, Jeshilkryetar!

Shkup, 11.06.2021

Alternativa – Kumanovë: LSDM dhe BDI e ushqejnë diskriminim sportiv në Kumanovë

Të nderuar qytetarë të qytetit të Kumanovës, të nderuara media, sot jemi dëshmitarë të një gjendjeje të mjerueshme e cila ka kapluar sportet në qytetin e Kumanovës. Si një qendër e dikurshme sportive, e cila ka pasur klube në të gjitha sportet, në ligat elite të Maqedonisë së Veriut, por edhe në Evropë, sot Kumanova është në një gjendje të mjerueshme, gjë që reflektohet më së miri nga rezultatet e klubeve sportive.
Komuna e Kumanovës, që udhëhiqet nga binomi BDI-LSDM, në vend që të merret me zhvillimin e sporteve dhe ruajtjen e traditave sportive, ka vendosur që të heshtë. Ndonëse, për hir të së vërtetës, qytetarët e Kumanovës e dinë fort mirë se pushteti i LSDM-së nuk ka trajtim të tillë edhe kur bëhet fjalë për sportin që zhvillohet në pjesët maqedonase të qytetit. Në atë anë kemi pishinë, objekte për hendboll, pista për vrapim, patinazh, terrene për tenis, të gjitha këto të mbuluara nga buxheti i Komunës dhe burime të tjera financimi, të cilat mbushen edhe nga të gjithë taksapaguesit, përfshirë edhe qytetarët shqiptarë.
Siç e dimë, kryetari Maksim Dimitrievski u tregua i aftë në rinovimin e plotë të kompleksit sportiv në lagjen “Sokolana”, por shfaqi paaftësi në rregullimin e këndeve për fëmijë në Lagjen e Trimave, në lagjen “Dardania”, në parkun e qytetit të Kumanovës, si dhe në pjesët tjera të qytetit, ku shumica e banorëve janë shqiptarë. Megjithatë, kulmi i neglizhencës së pushtetit BDI-LSDM është stadiumi i qytetit, i cili është lënë në gjendje të mjerueshme. Si duket LSDM-ja, por edhe BDI-ja, nuk janë aspak të interesuara për rregullimin e stadiumit të qytetit, aty ku dikur organizoheshin gara të ndryshme dhe ku reprezentacioni i Maqedonisë së Veriut zhvillonte ndeshje sportive me reprezentacionet e shteteve tjera. Hiç më mirë nuk është gjendja as me sallat sportive.
Pa u zgjatur në këto detaje shumë të njohura për kumanovarët, dëshirojmë të pyesim se a kanë përgjigje BDI-ja dhe LSDM-ja, si udhëheqëse të qytetit të Kumanovës, se pse kur shqiptarët mundohen që t`i shfrytëzojnë këto objekte sportive, trajtohen si të huaj dhe detyrohen të largohen me qëllim që të mos krijohen incidente? Ku është këtu koncepti multietnik i LSDM-së dhe ku është prirja gjelbëruese e BDI-së?
Po ashtu, meqë LSDM-ja në vitin 2016, në programin e saj zgjedhor, kishte premtuar se do ta rinovojë në tërësi stadiumin e qytetit të Kumanovës, madje duke paraqitur foto tredimensionale se si do të duket stadiumi i qytetit i rinovuar, e pyesim publikisht Maksim Dimitrievskin, ndërsa nëse ai nuk e di, në këtë pyetje mund të përgjigjen Martin Kostovski ose Oliver Ilievski, se deri ku është gjendja me stadiumin e Qytetit të Kumanovës dhe premtimin e vitit 2016?
Të nderuar drejtues të Kumanovës, edhe sa do të vuajë sporti në përgjithësi dhe sporti shqiptar në Kumanovë në veçanti nga binomi BDI-LSDM?
Sidoqoftë, ne e dimë se ju keni shkelur dhjetëra premtime dhe nuk skuqeni më, por e mira është se në vjeshtë janë zgjedhjet lokale dhe ju do ta merrni përgjigjen për të gjitha këto mashtrime. Ka ardhur koha që ata që nuk i mbajnë premtimet për qytetarët e Kumanovës ta lirojnë rrugën dhe të shkojnë në shtëpi.
Kumanova ka Alternativë!

Alternativa – Kumanovë

Kumanovë, 10.06.2021

Kryetari i Alternativës, Afrim Gashi ishte pjesë e recepcionit virtual të organizuar nga Ambasadori Italian në vend, z. Andrea Silvestri

Sot, kryetari Afrim Gashi, në Ditën Nacionale të Italisë, ishte pjesë e recepcionit virtual të organizuar nga Ambasadori Italian në vend, z. Andrea Silvestri.
Në recepcionin virtual, ku ishin pjesë e saj, miq, dashamirë, përfaqësues politikë dhe diplomatik, u shënua 2 Qershori – Dita Nacionale e Italisë. Urojmë që shteti italian, të mbetet njëra ndër shtetet mike tona, gjatë rrugëtimit tonë drejt Bashkimit Europian.

 

AlternAtivA: Identiteti gjinor nuk është përjetim personal, por identitet natyror

Duke qenë në Ditën Ndërkombëtare të Prindërve, që përkon edhe me kohën kur në procedurë kuvendore te ne është futur propozim-ligji për ndryshimin dhe plotësimin e Ligjit për evidencën amë, AlternAtivA, si parti parlamentare konservatore, është këtu që ta shprehë qëndrimin e saj përkitazi me këtë propozim-ndryshim dhe të deklarohemi për mbrojtjen e prindërve dhe të prindërisë.

Sipas nesh, mbrojtja e familjes tradicionale dhe e prindërve duhet të jetë një detyrë dhe përkushtim i gjithë shoqërisë, siç është përshkruar edhe në shumë konventa ndërkombëtare dhe akte të tjera të Kombeve të Bashkuara.

Ndërkaq, sa i takon çështjes së dytë, pra propozim-ndryshimit të Ligjit për evidencën amë, duhet të shpjegojmë se ideja e këtij ndryshimi është që, duke u nisur nga ideja liberale se identiteti gjinor është përzgjedhje dhe përjetim personal e jo identitet natyror i njeriut, të mundësohet që personat që dëshirojnë, të mund ta ndryshojnë identitetin e tyre edhe në evidencën amë, në certifikata dhe dokumente personale, madje edhe të mos kenë fare përcaktim gjinor, duke u regjistruar si gjinia “Tjetër”.

Propozues i këtij ndryshimi ligjor është Qeveria e Republikës së Maqedonisë, ku bëjnë pjesë edhe Bashkimi Demokratik për Integrim dhe disa filiale shqiptare të LSDM-së, por që e kanë pranuar këtë dhe, madje, do të jenë mbështetësit e këtij ligji në Kuvend. Në mesin e atyre që kanë nënshkruar këtë propozim është edhe zëvendësministri i Drejtësisë, nga radhët e BDI-së, Agim Nuhiu.

Sidoqoftë, pavarësisht se ky ligj ka ardhur në Kuvend me flamur europian, edhe pse vendet kryesore evropiane, si Britania e Madhe e Franca, nuk e kanë miratuar një ndryshim të këtillë, qëndrimi i AlternAtivA-s është se ky ligj bie ndesh me përcaktimet programore të partive konservatore europiane, siç jemi edhe ne. Për ne ekzistojnë vetëm dy gjini dhe ato janë natyrore – “Mashkull” dhe “Femër” dhe ato nuk janë kategori të ndryshueshme, por të lindura. Sipas nesh, secili që me forma të tjera plastike e ndryshon gjininë e tij të lindur për çfarëdo arsye, kjo është e drejtë e tij personale, por kjo nuk ka nevojë dhe nuk duhet të reflektohet edhe në legjislacionin vendor.

Prandaj deputetët tanë do të jenë KUNDËR këtyre ndryshimeve ligjore dhe ne do të jemi konsistentë në qëndrimin tonë, ndërsa shpresojmë se qytetarët do t’i mbajnë mend edhe ata deputetë që do ta votojnë këtë ndryshim ligjor.

Me këtë rast u bëjmë thirrje edhe partive të tjera në vend, veçanërisht atyre të spektrit të djathtë, por edhe komuniteteve fetare, si edhe OJQ-ve që besojnë në këto vlera, që të na bashkohen në këtë qëndrim, sepse pranimi i ndryshimit të identitetit gjinor nënkupton edhe ndryshim të identitetit të familjes sonë, madje edhe të shtetit tonë. Nëse Britania e Madhe dhe Franca ende hezitojnë ta bëjnë këtë, pse gjithë kjo ngutje që ta bëjmë ne?!

AlternAtivA – Shkup

Shkup, 01.06.2021

Afrim Gashi mbrëmë realizoi takim me degën e Kërçovës

Mbrëmë, në zyret e Alternativës- dega Kërçovë, kryetari Afrim Gashi, i shoqëruar nga Sekretari i Përgjithshëm, Bekim Sali dhe Sekretari Organizativ, Mubekir Palloshi, kanë realizuar takim me anëtarët e Kuvendit të kësaj dege.
Gjatë këtij takimit u fol rreth situatës politike në vend dhe përfundimin e reformave të brendshme partiake.
Kryetari Gashi, kërkoi nga gjithë kuvendarët dhe aktivistët e degës Kërçovë, që maksimalisht të angazhohen për fitoren e zgjedhjeve lokale.

Afrim Gashi sonte realizoi takim me strukturat e degëve: Vrapçisht dhe Gostivar

Sonte, kryetari Afrim Gashi, i shoqëruar nga Sekretari i Përgjithshëm, Bekim Sali dhe Sekretari Organizativ, Mubekir Palloshi, kanë qëndruar në qytetin e Gostivarit dhe komunën e Vrapçishtës, ku kanë realizuar takim me strukturat e degëve përkatëse.
Në këto takime u fol rreth situatës politike në vend, përmbylljen e procesit reformues brendapartiak dhe përgatitjet për zgjedhjet lokale të tetorit.
Kryetari Gashi, kërkoi nga giitha strukturat e Alternativës, mobilizim maksimal deri në fitoren e zgjedhjeve lokale.

Alternativa: Me ligjin për legalizimin e objekteve ilegale qeveria po kontrabandon amnisti për shkelësit e ligjit

Për çdo ditë që ky vend drejtohet nga binomi LSDM-BDI ky vend edhe më tepër largohet nga rruga e integrimeve evropiane. Së fundmi jemi dëshmitar të tentativës së qeverisë për të kontrabanduar amnisti për të gjithë ata të cilët kanë ndërtuar në kundërshtim me ligjin dhe për të cilët organet e drejtësisë kanë iniciuar procedura kundërvajtëse. Në një shtet i cili aspiron anëtarësimin në BE nuk mund të ndodhë që dy liderë të partive maqedonase, përmes konsensusit politik, të ndërhyjnë në organet e drejtësisë dhe të pamundësojnë që shkelësit e ligjit të marrin dënimin e merituar, kjo për pazare të tyre politike.
Më tutje, ky propozim ligj në mënyrën siç po tentohet të miratohet, përpos që nuk vlen për të gjitha rajonet në Maqedoninë e Veriut, i diskriminon qytetarët, duke i favorizuar ata të cilët kanë ndërtuar ilegalisht dhe duke i diskriminuar ata të cilët kanë ndërtuar në përputhje me ligjin. Madje, aq më keq, i motivon ndërtimet ilegale dhe shkeljen e ligjit në të ardhmen.
Kjo është arsyeja që ta pyesim publikisht kryeministrin Zaev: Cili është pazari politik me VMRO-në për të kaluar një ligj të tillë skandaloz? Si mendon ai dhe shpura e tij të instalojnë sundimin e ligjit dhe shtetin e së drejtës kur me konsensus politik e shkelin drejtësinë dhe ndërhyjnë në organet e gjyqësisë?!
Sidoqoftë, AlternAtivA e gjykon si të dëmshëm këtë veprim dhe konstaton se ky vend ngadalë, por sigurt, po largohet gjithnjë e më larg nga Europa, njëherazi duke i përzënë çdo ditë e më shumë qytetarët e tij drejt perëndimit.

Afrim Gashi sonte realizoi takim me strukturat e degës së Bogovinës

Sonte, kryetari Afrim Gashi, i shoqëruar nga Sekretari i Përgjithshëm, Bekim Sali dhe Sekretari Organizativ, Mubekir Palloshi, aktivitetin e tyre e kanë vazhduar duke realizuar takim me strukturat dhe aktivistët e degës së Bogovinës.
Gjatë këtij takimi u fol mbi përfundimin e procesit reformues brendapartiak, situatën aktuale politike në vend, ku me theks të veçant u diskutua edhe mbi përgatitjet e zgjedhjeve lokale të tetorit.
Gashi kërkoi nga aktivistët e Alternativës në Bogovinë, që të angazhohen maksimalisht që muaji tetor të jetë fitore plebishitare e Alternativës.

 

Populare