Wednesday, May 12, 2021
  • sq
  • en
  • mk
Home Blog

Koalicioni Aleanca për Shqiptarët & AlternAtivA: Kjo është qeveri antieruopiane dhe e dëmshme për qytetarët

Këtë ditë, kur u shënua Dita e Europës, i dëgjuam dhe lexuam edhe dhjetëra deklarata e postime të funksionarëve të këtij pushteti, që sikur mos t’i njihnim se kush janë dhe sikur mos t’ua dinim veprat, do të besonim se krejt barra e BE-së ka rënë mbi supet e tyre.
E që të mos mendojnë se qytetarët nuk e dinë se kush janë ata dhe cilat janë veprat e tyre, do ua kujtojmë sot disa elemente, për të dëshmuar se ata për gjithçka mund të mërziten, pos për integrimin e Maqedonisë së Veriut në Bashkimin Europian. Disa nga arsyet e këtij konstatimi janë edhe këto:
– Kjo qeveri është formuar mbi paradigmën e mashtrimit “kryeministri shqiptar”, duke u shndërruar kështu në pushtetin ekzekutiv që ka rrënuar çdo kriter demokratik dhe moral të pjesëmarrjes në zgjedhje;
– Kjo qeveri ka ardhur si rezultat i zgjedhjeve të 15 korrikut të vitit 2020, të cilat për ne janë jolegjitime, ngase në këto zgjedhje manipulimi i votës, vjedhja, blerja dhe format e tjera të deformimit të vullnetit demokratik u bënë standard i një shteti që, së paku, zyrtarisht aspiron për të qenë anëtar i BE-së;
– Ky pushtet i ka dhënë tokë ndërtimore në vlerë prej 200 milionë eurosh një afaristi kontrovers, siç është Daka Davidoviq, që sponsorizon agjenda antierupiane në rajon;
– Kjo qeveri ka dështuar plotësisht me sistemin arsimor në kohë pandemie, ndërsa rezultatet e këtij dështimi do t’i ndjejmë edhe shumë kohë në të ardhmen;
– Kjo qeveri ka bërë që të humben mbi 60 mijë vende pune dhe ekonomia vendore të vihet buzë greminës;
– Kjo qeveri është sjellë ndaj pandemisë në stilin “Le të shpëtojë kush si mundet!”, andaj sot shkalla e vdekjeve në RMV është më e larta, ndërsa imunizimi ndër më të ulëtit në Europë;
– Kjo qeveri ka mundësuar të pajisen me pasaporta mbi 200 kriminelë ordinerë ndërkombëtarë, që kërkohen në gjithë botën, me çka dëshmon se RMV-ja është bërë strehimore për kriminelët, ndërsa ky pushtet është thellë i përfshirë në krim të organizuar ndërkombëtar;
– Kjo qeveri sot “mburret” vetëm me kanabizimin e shtetit, ku drejtuesit e policisë janë bashkëpunëtorët më të ngushët të narko-dilerëve;
– Në listat e vetme ku kjo qeveri e ka vendosur shtetin tonë në krye janë indekset e korrupsionit, kjo e shfaqur bile edhe në blerjen e vaksinave;
– Duke e ditur se drejtësia është vlera fondamentale e BE-së, kjo qeveri e ka bërë të kundërtën – politizimin, etnizimin dhe partizimin e sistemit të drejtësisë;
– Kësaj qeverie selia e NATO-s nuk ia pranon emrat për oficerë në NATO, kjo për shkak të përfshirjes së tyre në shërbime inteligjente antiperëndimore;
– Së fundmi, kjo qeveri synon të bëjë edhe abuzimin me mediat, në mënyrë që ta ngufasë fjalën e lirë dhe të drejtën e informimit objektiv, që janë parime themelore europiane.

Krejt këto që i përmendëm shkurtimisht, për shkak të hapësirës së ngushtë, por edhe shumë elemente të tjera, që nuk arritëm t’i përfshijmë, janë dëshmia më e mirë se ky shtet e ka marrë tërkuzën nëpër këmbë dhe ka hequr dorë nga integrimi europian. Parametrat janë këto, ndonëse fjalën mund t’i kenë të tjera.
Andaj, duke e pasur këtë bilanc antiintegrues, ne – Koalicioni Aleanca për Shqiptarët & AlternAtivA – gjykojmë se shpëtimi i vetëm për t’u kthyer në agjendën europiane është që ky pushtet të ikë sa më shpejt dhe të hapet perspektiva për një frymë integruese në BE. Zgjedhjet e parakohshme dhe një shumicë e re mund të ndërtojnë një rrëfim tjetër për Maqedoninë e Veriut karshi procesit integrues në Bashkimin Europian.

Koalicioni Aleanca për Shqiptarët & AlternAtivA

Shkup, 11.05.2021

Koalicioni Alternativa dhe Aleanca për Shqiptarët: Qeveria po bëhet gati t’i blejë mediat me paratë e qytetarëve

Në kohën kur, si pasojë e rritjes së çmimeve qytetarët mezi mbushin barkun me bukë dhe kur ende mungojnë vaksinat për imunizimin e popullatës, Qeveria e Maqedonisë së Veriut, përmes Ministrisë së Ekonomisë, me një tender prej 220.000 eurosh po bëhet gati gjoja t’i sponsorizojë mediat, më saktë internet-portalet me video-spote për promovimin e turizmit, gjithë kjo në kulmin e pandemisë.
Është tejet e çuditshme si në kohë pandemie dhe të një krize ekonomike, e cila po troket në derë, qeveria i jep prioritet një projekti si ky, por edhe më skandaloze është fakti se do të zgjidhet një kompani e cila pastaj do të vendosë se cilat portale do të marrin nga këto mjete financiare me kritere të padëgjuara deri më tani. Sip duket, listën e tyre do e përpilojë Qeveria me portalet e pëlqyera.
Në kohën kur vetëm 3% e popullatës janë vaksinuar, nuk ka si komentohet ndryshe ky hap i qeverisë, përpos si një tentativë për rritjen e trysnisë mbi mjetet e informimit, për t’i korruptuar mediet, për të tentuar blerjen e tyre, si dhe për shpagim të medieve “të tyre’’ në prag të zgjedhjeve lokale.
Nisur nga kjo, i apelojmë Qeverisë që t’i përgjigjet kërkesës së punëtorëve turistikë dhe mjetet t’ua transferojë atyre si ndihmë, që ata vetë të kujdesen për reklamim të turizmit vendor.

Koalicioni Aleanca për Shqiptarët & AlternAtivA

Shkup, 06.05.2021

Koalicioni Aleanca për Shqiptarët & AlternAtivA: Në Aerodorom – lule, në Çair mure!

Të nderuar përfaqësues të mediave, jemi sot këtu para Murit të Turpit “Visar Shilegov”, për të shprehur indinjatën tonë dhe të qytetarëve të Çairit për këtë poshtërim që na bëhet neve si qytetarë të Shkupit.
Derisa kryetari i Qytetit të Shkupit nëpër pjesët e tjera të qytetit, si në Aerodrom, Karposh e në Gjorçe Petrov mbjell lule, në Çair që nga viti i kaluar mbjell vetëm beton. Dhe, duke pasur këtu një kryetar Çairi kukull, që edhe ashtu është instaluar nga Shilegovi e shefat e tij, qytetarët këtu janë vendosur nën trysninë e betonizimit dhe mëshirën e atyre që Çairin po e ndajnë me beton.
Sikur të mos mjaftojnë ndërtesat ilegale që mbijnë çdo ditë nëpër Çair, duke ua zënë frymën qytetarëve, dhe që janë më të larta edhe se korrupsioni e ryshfeti që e marrin këtë zyrtarë të Komunës së Çairit, Shilegovi ka vendosur që ta poshtërojë Çairin edhe me këtë mur, të cilin ne e kemi quajtur “Muri i Turpit Visar Shilegov”. Për ata që nuk e kanë ndërmend të vazhdojnë të jetojnë në Çair, siç bëjnë rëndom kryetarët e Çairit pasi e përfundojnë mandatin, ky nuk është problem, por për neve që e duam Çairin si pjesë të qytetit, sepse Çairi është jeta jonë, ky mur është poshtërim, nënçmim dhe zgjidhja më e keqe infrastrukturore që mund të bëhet për ta rregulluar komunikacionin në komunën më të dendur në Europë.
Duke mos qenë indiferentë ndaj këtij turpi, ne sot jemi këtu që ta shprehim revoltën tonë dhe, përveç kësaj, ta ilustrojmë me tekst turpin e këtij muri dhe ta emërtojmë me emrin e tij të saktë.
Koalicioni Aleanca për Shqiptarët & AlternAtivA i bën thirrje Kryetarit të Shkupit, Petre Shilegov, që ta heqë këtë beton nga Çairi dhe të ofrojë zgjidhje tjetër. Në të kundërtën, sapo ta fitojmë Komunën e Çairit në vjeshtë, gjëja e parë që do ta bëjmë është ta çlirojmë Çairin nga betoni dhe në vend të murit, që është simbol i dhunës, poshtërimit dhe burgut, të ofrojmë zgjidhje me gjelbërim dhe zbukurim, siç i kanë hije komunës që edhe emrin e ka në asociacion me gjelbërimin.

Ta shpëtojmë Çairin nga betoni!

Koalicioni Aleanca për Shqiptarët & AlternAtivA

Shkup, 06.05.2021

https://www.facebook.com/alternativamkal/videos/1267071337023397/

Kolicioni AlternAtivA dhe Aleanca për Shqiptarët: Numri i vdekjeve nga Covid-19 flet për vdekjen e institucioneve përgjegjëse

Duke e ndjekur në vazhdimësi gjendjen e krizës së shkaktuar nga pandemia Covid 19, si dhe duke i parë pasojat që i sjellë kjo pandemi, koalicioni AlternAtivA dhe Aleanca për Shqiptarët konstaton se Qeveria e RMV-së dhe Ministria e Shëndetësisë vazhdojnë të sillen me neglizhencë ndaj lëshimeve të bëra nga vetë ata, gjë që si pasojë po rezulton me numër të madh të vdekjeve, si dhe dëme të tjera shëndetësore dhe materiale.

Kështu, përkundër faktit se ka rënë ndjeshëm numri i infektimeve, vazhdon të mbetet i lartë numri i të vdekurve. Sa për krahasim, derisa në Maqedoninë e Veriut gjatë muajit prill mesatarja e infektimeve ka qenë 728 në ditë, në Kosovë ka qenë 472 dhe në Shqipëri ky numër ka qenë 189 të infektuar në ditë. Ndërkaq, kur i krahasojmë shifrat e vdekjeve, derisa në Maqedoni në prill mesatarja ka qenë 37 persona të vdekur në ditë, në Kosovë ka qenë 13 dhe në Shqipëri ka qenë 5 persona të vdekur në ditë.

Këto shifra flasin për dy gjëra: 1) Se ka rënë ndjeshëm virulenca e virusit dhe ky është një lajm i mirë dhe 2) Se është rritur neglizhenca e pushtetit në Maqedoninë e Veriut ndaj të sëmurëve me Covid-19, që është një lajm i keq. Ndryshe nuk ka mundësi që vendi ynë përsëri të mbetet me shkallë kaq të lartë infektimeve dhe, veçmas, të vdekshmërisë.

Pra, me gjithë rënien e virulencës së virusit, Maqedonia e Veriut vazhdon të mbetet ndër vendet me vdekshmëri më të lartë në Europë dhe kjo nuk shpjegohet ndryshe, pos me dështimin e plotë të sistemit shëndetësor. Vetëm një shtet joserioz, me këso qeverie dhe me këso drejtuesish në Ministrinë e Shëndetësisë mund të lejojë që numri i infektimeve dhe numri i të vdekurve të vazhdojë të mbetet pakrahasimisht më i lartë në rajon dhe në Europë.

Prandaj, kjo gjendje kërkon që dikush të japë përgjegjësi dhe të japë llogari. Në kushte normale këto shifra do të nënkuptonin jo vetëm dorëheqje të ministrit të Shëndetësisë, por edhe të Kryeministrit, por duke e ditur se ky pushtet nuk e njeh nocionin e përgjegjësisë, është e nënkuptueshme se as këto shifra nuk paraqesin shqetësim për ata.

Prandaj mundësia e vetme që të shpëtojmë nga ky pushtet i papërgjegjshëm është që ai të shporret sa më shpejt, qoftë përmes zgjedhjeve të reja ose përmes krijimit të një shumice të re. Kjo është mënyra e vetme që qytetarët të shpëtojnë dhe që shifrat e humbjeve dhe dështimeve të ulen.

AlternAtivA – Shkup

Shkup, 06.05.2021

AlternAtivA: Koncepti për arsimin fillor dhe digjitalizimi i teksteve shkollore është i papranueshëm për ne

Sot në selinë e Alternativës u mbajt një brifing me gazetarët, të cilin e kishte ftuar kryetari i partisë, Afrim Gashi. Në këtë brifing ishin të pranishëm edhe prof. dr. Lulzim Aliu – profesor në Fakultetin Pedagogjik “Sh. Kliment Ohridski dhe nënkryetar i Alternativës dhe prof. dr. Zeqirija Ibrahimi – hulumtues shkencor dhe anëtar i Kryesisë Qendrore të partisë.
Në këtë takim me gazetarët shtruan disa çështje. Afrim Gashi – kryetar tha se arsyeja e organizimit të këtij brifingu është Koncepti i arsimit fillor dhe propozimi për digjitalizimin e teksteve shkollore, i propozuar nga Ministria e Arsimit dhe Shkencës (MASH), aq më shumë që – sipas tij – tema e arsimit është ndër çështjet më themelore të angazhimit politik të Alternativës, nëse jo edhe tema qendrore e programit të saj.
Sipas tij, problemi themelor në Konceptin e arsimit fillor është qasja që ka MASH-i. Në këtë rast kemi një imponim pa asnjë konsultim me faktorët e tjerë politikë dhe profesionalë në vend. Ai u shpreh i bindur se kjo do të ketë impakt negativ për arsimin në Maqedoninë e Veriut. Ai edhe një herë i bëri thirrje Qeverisë dhe MASH-it që t’i marrë parasysh vërejtjet dhe ta pranojë bashkëpunimin për ta shqyrtuar dhe diskutuar këtë propozim me të gjithë faktorët deri në vendimin përfundimtar. “Në të kundërtën, nëse MASH-i vazhdon të sillet me prepotencë ndaj vërejtjeve tona, në kohën që do të jemi në pushtet, ne do të jemi të detyruar që ta pezullojmë këtë koncept dhe në konsultim me të gjithë faktorët politikë dhe profesionalë të miratojmë një koncept tjetër të gjithëpranuar në vendin tonë.”, tha ai.
Kryetari i Alternativës u shpreh edhe kundër idesë për heqjen e plotë të teksteve të shtypura shkollore, kjo me shpjegimin se kjo nuk funksionon gati se askund në botë dhe se qëndrimi i ekspertëve të Alternativës është se kjo do të rezultojë me dëmtim të suksesit të nxënësve. Ai shtoi se vetë fakti se sa i pasuksesshëm doli viti me mësimin online, është dëshmi e mjaftueshme se sa mund të jetë e suksesshme ideja për heqjen e teksteve të shtypura shkollore. Ai, madje, tha se edhe fakti që ndryshimet ligjore duhet të vijnë në Kuvend me flamur të BE-së, kjo është mënyrë që ta imponojnë këtë ndryshim pa mundësi debati dhe diskutimi, që nuk është aspak europiane.
Prof. Lulzim Aliu u ndal në mënyrën se si është vendosur të implementohet Koncepti në shkollë nga shtatori i këtij viti. Ai tha se para se të vendoset ndryshimi i konceptit të arsimit fillor, së pari duhet të ndryshojë koncepti i krijimit të kuadrove që duhet të punojnë në të. Kjo i bie se pa i bërë ndryshimet e nevojshme në arsimin sipëror, pra të fakulteteve të mësuesisë, nuk mund të pretendohet ndryshimi i konceptit të arsimit fillor. Vërejtja e tij ishte se koncepti i arsimit fillor nuk mund të ndryshojë vetëm nga ekspertët e pedagogjisë, siç ka ndodhur, porse duhet të përfshihen edhe ekspertët e fushave të tjera. Megjithatë, sipas tij, problemi themelor është mungesa e pilotimit të konceptit. “Si mund ta dijë ministrja se ky koncept është më i miri kur ai nuk është provuar dhe nuk është verifikuar me matje empirike të suksesit të tij?”, pyeti ai. Kjo nuk ndodhë në asnjë shtet të zhvilluar. Prof. Aliu iu referua edhe një hulumtimi që është bërë me arsimtarët nga vetë ministria, të cilat MASH-i nuk i ka marrë parasysh fare në hartimin e konceptit të ri.
Prof. Zeqirija Ibrahimi tha se kriteri themelor i këtij koncepti të arsimit fillor është eliminimi i diskriminimit, duke e vënë theksin veçanërisht te diskriminimi gjinor, ndërsa është kaluar pa u vënë re fakti se fëmijët shqiptarë dhe të bashkësive të tjera etnike nuk janë të barabartë me nxënësit maqedonas. Me këtë koncept nxënësit maqedonas nuk janë të detyruar ta mësojnë shqipen ose një gjuhë tjetër të bashkësive etnike të vendit tonë, ndërsa nxënësit shqiptarë dhe të tjerë janë të detyruar që ta mësojnë maqedonishten. Problem tjetër, sipas tij, është edhe imponimi ideologjik i lëndëve që mund të bien ndesh me organizimin tonë social dhe konservator. Ai argumentoi se nxënësi që do ta mësojë lëndën e Edukatës fetare të krishterë ose islame, do të ketë edhe lëndë të misticizmit hindus, pra jogën, si dhe derisa në lëndën e Edukimit fetar do ta mësojë se familja heteroseksuale është celula e shoqërisë, në lëndën e Edukatës seksuale do të mësojë se gjinia është përzgjedhje e jona dhe familja mund të jetë edhe bashkëjetesë homoseksuale. Prandaj, ai tha se “kjo më së paku do të krijojë frustrim te fëmijët”. Prof. Ibrahimi më tej vazhdoi me shpjegimin se “ndonëse në parim ia njohim çdokujt të drejtën e lirisë së orientimit seksual, jemi të bindur se askujt nuk i lejohet që një standard liberal i perceptimit të organizimit social ta imponojnë si lëndë shkollore”. Aq më shumë – u shpreh ai – që ky koncepcion po imponohet si në monizëm: pa asnjë konsultim dhe pa asnjë matje ose pilotim të tij.

AlternAtivA – Shkup

Shkup, 29.04.2021

 

AlternAtivA – Dega Tetovë: Shtegu i biçikletave në Tetovë është i shtruar me korrupsion dhe skandale

Komuna e Tetovës, me në krye Teuta Arifin, ashtu siç e filloi mandatin katër vite më parë, si duket edhe do ta mbyllë me shume skandale dhe keqpërdorime në këtë institucion. Pas përmbylljes së vitit 2020 me humbje shtesë prej 2 milionë eurosh, ajo edhe sot e kësaj dite vazhdon me keqpërdorimin e mjeteve të qytetarëve. Gjëja e fundit, sipas raportimit të mediave, del skandali me tenderimin e shtegut të biçikletave në Tetovë.

Që skandali të jetë edhe më i madh, Komuna e Tetovës me procedurë të fshehtë ka ndarë mjete nga buxheti për shërbime intervente për punime për shtegun e biçikletave, ku “NB-Company” e ka fituar këtë të drejtë, ndërsa nga ana tjetër si nënkontraktues për t’i kryer punët del kompania “Siguria”, ku pronare është Merita Mustafai, bashkëshorte e Elmir Mustafait, i punësuar në Sektorin për Komunikacion dhe Tokë Ndërtimore pranë Komunës së Tetovës.

Kjo nuk është hera e parë që kjo kompani fiton tenderë nga Komuna e Tetovës, por në këtë rast Elmir Mustafai, si personi kompetent për hartim, strategji dhe ekspertizë të komunikacionit në Tetovë, ia ka dhëne tenderin vetes dhe bashkëshortes së tij.

Duke pasur dyshime serioze, AlternAtivA – Dega Tetovë i bën thirrje Komisioni për Parandalimin e Korrupsionit ta hetojë këtë rast, si dhe institucionet tjera relevante ta shqyrtojnë këtë procedurë të tenderimit.

AlternAtivA – Dega Tetovë

Tetovë, 27.04.2021

AlternAtivA: Ministria e Mjedisit Jetësor dhe Planifikimit Hapësinor funksionon si filiale e BDI-së

Se korrupsioni nuk është nocion fiktiv dhe anonim, porse është koncept real dhe e ka emrin BDI, kësaj radhe është kujdesur Ministria e Mjedisit Jetësor dhe Planifikimit Hapësinor dhe Drejtoria e Mjedisit Jetësor, të drejtuara nga kuadro të BDI-së.
Kështu, pas shpalljes së rezultateve të projekteve të kësaj ministrie nga Programi për investim në mjedisin jetësor për vitin 2021, duket qartë se BDI-ja është kujdesur mirë që ato projekte t’i fitojnë vetëm funksionarët dhe aktivistët e saj, në këtë rast Hisen Xhemaili, drejtor i Drejtorisë së Mjedisit Jetësor dhe i biri i tij.
Kështu edhe një herë po konfirmohet qëndrimi ynë së kjo qeveri funksionon vetëm për interesa të ngushta klanore, herë të LSDM-së e herë të BDI-së, varësisht kush e drejton me dikasterin përkatës.
Andaj, AlternAtivA konstaton se Programi për investim në mjedisin jetësor për vitin 2021 nuk ka të bëjë fare për mbrojtjen e mjedisit jetësor dhe të ekologjisë në vend, por ka të bëjë vetëm më pasurimin e funksionarëve të BDI-së. Krejt kjo po ndodhë kur kjo qeveri ka krijuar resor për luftë kundër korrupsionit, që si duket më shumë merret me evidentimin aferave korruptive ose, mbase, edhe me motivimin e tyre sesa me parandalimin e tyre.
Sidoqoftë, shpresojmë se tragjikomedia e kësaj Qeverie të përfundojë sa më parë dhe kështu qytetarët të shpëtojnë nga kjo qeverisje antipopullore.

AlternAtivA – Shkup

Shkup, 26.04.2021

Koalicioni ASH-AAA: Pas protestës së sotme të organizuar nga VMRO, “ora policore dhe kufizimet nuk kanë më asnjë kuptim”

Pas protestës së sotme të organizuar nga opozita maqedonase, ora policore dhe kufizimet nuk kanë më asnjë kuptim. Pas kësaj s’ka logjikë të vazhdohet edhe më tej me kufizimet dhe orën policore.
Pa dashur të ndërhyjmë në motivin e protestës, sepse kemi shumë për të thënë, por ajo që i irriton qytetarët është ora policore, sidomos në Muajin e Ramazanit, kur besimtarëve myslimanë u pamundësohet t’i kryejnë detyrimet fetare.
I bëjmë thirrje komisionit për sëmundje ngjitëse dhe Qeverisë që sa më shpejt, që ditën e nesërme, ta shfuqizojë orën policore dhe t’i lejojë qytetarët e besimit Islam që t’i kryejnë detyrimet fetare pa pengesa,gjithashtu të fillojnë me punë edhe gastronomitë që janë të goditura nga ora policore, me çrast ngelën pa punë shumë punëtor dhe pa të ardhura materiale!

Koalicioni Aleanca për Shqiptarët dhe Alternativa

Koalicioni Aleanca për Shqiptarët & AlternAtivA: Kërkojmë dorëheqje nga Venko Filipçe dhe Ilir Hasani

Duke ndjekur tempon e vaksinimit të popullatës së Maqedonisë së Veriut dhe duke e krahasuar atë me vendet europiane, madje edhe me ato të rajonit, nuk mund të mos jemi të shqetësuar me këtë që po ndodhë në vendin tonë. Ne po bëhemi vendi i parë më vdekshmëri në Europë, ndërsa i fundit për vaksinim.
Sipas një burimi të Bloomberg-ut, ku është paraqitur analiza e vaksinimit të deritanishëm të popullsisë për shtete, shihet qartë se me këtë tempo siç ka filluar, Maqedonia e Veriut ngec shumë pas vendeve të rajonit, madje kur llogaritet faza e kaluar dhe kjo që vijon, i bie se për imunizimin e plotë të popullatës në vendin tonë do të duhet të presim edhe 10 vjet të plota.
Në anën tjetër, tragjikomedia vazhdon. Jo më shumë se para dhjetë ditëve, zëvendëskryeministri i vendit, Artan Grubi, në një emision krekosej se mund të sigurojë në çdo moment deri në 5 milionë vaksina, mbase duke mos e ditur se cili është kuptimi i saktë i atij numri. Sikur të mos ishte tragjedia, sepse çdo ditë po rritet numri i vdekjeve, deklaratat e eksponentëve të BDI-së do të ishin komedi.
Duke mbetur në mëshirë të fatit, pra pas asnjë mbështetje nga Qeveria, qytetarët kanë filluar ta bëjnë betejën me pandeminë Covid 19 kush si gjendet: dikush shkon në Serbi për vaksinim e dikush në Shqipëri.
Kjo edhe është arsyeja që koalicioni Aleanca për Shqiptarët & AlternAtivA i mban përgjegjës për këtë drejtuesit e Ministrisë së Shëndetësisë, ministrin Venko Filipçe dhe zëvendësin e tij, Ilir Hasani, të cilët janë emrat e përveçëm të këtij dështimi dhe të kësaj tragjedie të numrave të vdekjeve dhe infektimeve në RMV. Prandaj, dorëheqja do të ishte gjëja më e vogël që ata mund ta ofrojnë, që së paku moralisht të shpresojnë për shfajësim.
Për fund po e përsërisim se neve si shtet na duhet një garanci se Maqedonia e Veriut do t’i sigurojë vaksinat për gjithë popullsinë, që një ditë e më parë të fillojë imunizimi i gjithë popullatës. Në të kundërtën, edhe pse nuk do kishim dashur të ndodhë një skenar i zi, por e ardhmja mund të jetë me dëme edhe më të mëdha njerëzore dhe materiale.

Koalicioni Aleanca për Shqiptarët & AlternAtivA – Shkup

Shkup, 22.04.2021

https://www.facebook.com/alternativamkal/videos/938498410314133/

AlternAtivA: Bujq nuk janë vetëm ata nga Strumica e Kryeministrit dhe nga Prespa e ministrit të Bujqësisë

Sot, pasi që disa bujq të zonës së Hasanbegut dhe Haraçinës ishin në vizitë te kryetari i Alternativës, Afrim Gashi, po e shfrytëzojmë këtë rast që t’i drejtohemi opinionit për ta informuar për ankesat e tyre dhe për qëndrimin tonë kundrejt kërkesave të parashtruara.
Ashtu siç na njoftuan bujqit, pas vërshimit të vitit të 2018 në këtë zonë, kur shumë toka bujqësore u dëmtuan dhe shumë kultura bujqësore u shkatërruan plotësisht, qeveria e pati premtuar se të gjithë këta bujq të dëmtuar do të dëmshpërblehen. Megjithatë, kanë kaluar gati tre vite dhe kjo nuk ka ndodhur. Madje, ndonëse edhe në fushatën e fundit zgjedhore ai premtim u ishte përsëritur nga LSDM-ja dhe filialet e saj, në realitet nuk ka ndodhur asgjë. Ndërkohë janë shpërblyer bujqit e Strumicës, të dëmtuar nga reshjet e korrikut të vitit 2018, si dhe bujqit Prespës, që ishin dëmtuar nga reshjet e majit të vitit 2019. Kjo është arsyeja që këta bujq, larg përkatësive politike dhe etnike, po u drejtohen partive politike për të kërkuar mbështetje për të drejtën e tyre të nëpërkëmbur.
Ajo që mbetet indikative në këtë rast është pse mund të dëmshpërblehen bujqit e Strumicës së Kryeministrit dhe të Prespës së ministrit të Bujqësisë, gjë që paraqet jo vetëm skandal, por edhe diskriminim shumëplanësh me shenja korrupsioni, por jo edhe ata të Haraçinës e të Hasanbegut? Këtu nuk duhet harruar se jo më larg se javën e kaluar ministri i Bujqësisë ishte protagonist i aferës së shpenzimeve prej 23.000 euro për tre muaj vetëm për ushqim dhe kafe. Shikuar nga pozicioni i bujqve, nuk mund të mos dyshohet se ky ministër po sillet me paratë e tyre si të jenë pronë e tij private dhe mbase këto shpenzime janë adresa edhe për pyetjen se pse bujqit e Hasanbegut dhe të Haraçinës nuk janë dëmshpërblyer.
Me këtë rast kryetari i Alternativës, që është njëherazi edhe deputet i zonës përkatëse u ka premtuar bujqve se ai do të angazhohet për çështjen e tyre dhe se ai dhe AlternAtivA do të jenë avokatë të tyre në Kuvend dhe kudo që do të shtrohet kjo temë.

AlternAtivA – Shkup

Shkup, 20.04.2021

Populare